16 лютага ў нашай установе адукацыі пачаўся Тыдзень роднай мовы і літаратуры. Зборныя каманды з вучняў 5-9 класаў прынялі актыўны ўдзел у квэст-гульні "Беларуская скарбонка", падчас якой праходзілі выпрабаванні па станцыях, праяўляючы кемлівасць і здагадлівасць. Удзельнікам квэсту неабходна было прадэманстраваць веданне беларускай арфаграфіі, літаратуры, культуры і традыцый. Перамогу атрымала каманда "Сяброўкі", якая адной з першых прайшла ўсе выпрабаванні і ў выніку сабрала ключавое слова - ВАНДРОЎКА. Сапраўды, вандроўка была цікавай, захапляльнай і карыснай.
Фотатэст "Славутыя імёны Бацькаўшчыны" сабраў навучэнцаў 5-6 класаў. Яны адгадвалі па апісанні тую ці іншую знакамітую асобу Беларусі: Е.Полацкую, Ф. Скарыну, Я. Купалу, Я.Коласа і іншых. Навучэнцы прынялі актыўны ўдзел у віктарыне па творах. Увага вучняў была засяроджана таксама на інфармацыйнай выставе, аформленай з нагоды юбілеяў беларускіх пісьменнікаў і паэтаў.
18 лютага ў нашай установе адукацыі "разгарэўся" сапраўдны ажыятаж сярод інтэлектуалаў-навучэнцаў 5-9 класаў на веданне беларускай лексікі. Хлопчыкі і дзяўчынкі, а таксама настаўнікі наперабой цягнулі васілёчкі з назвамі слоў на рускай мове, якія неабходна было перакласці на беларускую. За ўменне правільнага перакладу слоў і выразаў удзельнікаў інтэрактыўнай гульні "Перакладчыкі" чакалі салодкія пачастункі і канцылярскія тавары. Інтэрактыўная гульня дала магчымасць навучэнцам яшчэ раз упэўніцца ў тым, што беларускую мову трэба не толькі любіць, але ведаць і вывучаць.
Чацвёрты дзень Тыдня роднай мовы ў нашай установе адукацыі прайшоў цікава. Вучні 4, 5 і 6 класаў як быццам трапілі ў атмасферу тых далёкіх часоў, у пачатак 20 стагоддзя. А дапамог ім у гэтым музей нашай установы. Вучні не проста пазнаёміліся з побытам, а пабылі ў ролі герояў паэмы Якуба Коласа "Новая зямля": бацькоў паэта, Яські Базылева, Костуся, Уладзіка, праінсцэніраваўшы ўрывак "Дарэктар". Вучні як быццам перанесліся ў тыя далёкія часы, калі дзеці сялян вучыліся не ў школе, а дапамагаў ім здабываць веды хатні настаўнік, так званы "дарэктар". Вучні ўпэўніліся ў тым, што прачытаць твор - гэта цікава, а пабыць у ролі таго ці іншага героя яшчэ цікавей.
20 лютага, напярэдадні Міжнароднага дня роднай мовы, вучні павіншавалі настаўнікаў, выхавацеляў дзіцячага сада і работнікаў установы адукацыі са святам. Вельмі прыемна было ім пачуць шчырыя віншавальныя словы, а таксама атрымаць цукеркі "Родныя словы" з цікавымі заданнямі. Далей святкаванне Дня роднай мовы працягнулася ў кабінеце беларускай мовы і літаратуры. Сапраўднымі аматарамі і знаўцамі роднага мілагучнага слова сталі трое настаўнікаў і 15 вучняў 5-9 класаў , якія прынялі актыўны ўдзел у напісанні Гродзенскага абласнога дыктанта. Вось так цікава прайшло святкаванне Міжнароднага дня роднай мовы.
